Тыл- омук күндү баайа

Төрөөбүт тыл барахсан киһи ис кыаҕын арыйарыгар, олоххо тирэхтээх буоларыгар улахан көмөлөөх күүс буолар. Оҕо бэйэтин төрөөбүт тылынан лоп-бааччы көҥүллүк саҥарара бэйэтин инникитин туһугар буолар. Сахалыы толкуйдуур оҕо санаатын сааһылаан саҥарар, ситимнээн суруйар, толкуйа дириҥ, санаата киэҥ буолар.

            Билиҥҥи оскуола программатыгар прозаны өйтөн ааҕыытааҕар  хоһоону өйтөн ааҕыы, хоһоон конкурса элбэх. Тыл культуратыгар лексиканы, сомоҕо, кэлим тыллары байытыыга прозаны ааҕыы улахан суолталаах, тоҕо диэтэххэ проза саҥарар саҥаҕа чугас. Ааҕыы уруогар оҕо тиэкис ис хоһоонун автор тылынан сыыс тыла суох сиһилии кэпсиирин , сирэй саҥаны, уус-уран ньыма арааһын сөпкө тутуһан кэпсиирин ситиһиэхтээхпит. 1-Нөөрүктээйи оскуолатыгар сахалыы кылаас суох, оттон саха кылаастаах Улахан Мунку оскуолатын сабыллар кутталга олороллор. Кинилэр сыл аайы фольклор араас жанрын киллэрэн туран «Өбүгэ үгэһэ” диэн интеллектуальнай оонньуу ыыталлар. Оҕоҕо кыра сааһыттан ийэ тыл кэрэтин иҥэрдэххэ, саха омук быһыытынан эстибэт, сиик курдук симэлийбэт дьону-сэргэни кытары бодоруһар кыахтанар.Оччоҕо саха омук өлөн-оһон биэрбэт дьылҕаланар. Ити сыалы-соругу салҕыы сайыннаран кулун тутар 2 күнүгэр, Өлүөхүмэ оройуонун Кыыллаах орто оскуолатыгар, өйтөн остуоруйаны, кэпсээни ааҕыы күрэҕэ «Сахам тылын урана, сахам тылын абылаҥа» диэн  ааттаах тэрээһин буолла. Кыыллаах, Токко, Хоро, Абаҕа оскуолаларыттан барыта 24 оҕо кытынна. Дьүүллүүр сүбэ маннык быраабылаларынан түмүгү таһаарда:

  • айымньыны истээччи өйдүүрүгэр тириэрдии;
  • артыыстааһын, уобараска киирии;
  • сирэй саҥаҕа сурук бэлиэтигэр тохтоон, сөпкө тыынан кэпсээһин.

                             Икки бөлөҕүнэн наардаан сыаналаата: 1 бөлөххө 1-2 кылаас, 2  бөлөххө 3-4 кылаас. Киһи иһиттэр истиэх курдук бииртэн биир оҕо тахсан кэпсээн истэ, биһиги да нуучча тыллаах оройуоммутугар сахалыы саҥа сүтүө суох диэн эрэл санаа үөскээтэ.Сорох оҕо автор тылын бэйэтин тылынан солбуйара баар суол,ол сыыһа, холобур чокуур диэн тылы испиискэ диир, кыырт диэни чыычаах диир. Сөпкө саҥардахпытына төрөөбүт тылбытын билиэхпит. Улуу Ойуунускай, Суорун Омоллоон уо.д.а. суруйан хаалларбыт кэпсээннэрин сыыһырдыбакка, ытыктаан хайдах суруйбуттарынан кэпсиэхтээхпит.

Күрэхпит түмүгэ маннык буолла:

Габышева Аэлита- 1 миэстэ 3 кл  (Габышев М.А)Хоро

Филиппов Афанасий -3 миэстэ 3 кл(Кардашевская Р.Е)Хоро

Яковлева Лия- 3 миэстэ  4 кл(Менякова А.В)Хоро

Ноговицына Нарыйа- 3 миэстэ  1 кл  (Лепчикова Т.Г.)Хоро

Хохолова Инесса- 2 миэстэ 2 кл  (Лазарева У.Н)Абаҕа

Ксенофонтова Мария- 2 миэстэ 2 кл (Лазарева У.Н)Абаҕа

Акимов Никита -2 миэстэ 4 кл (Корнилова Т.Л.)Кыыллаах

Ларионова Ньургустана -3 миэстэ 4 кл (Корнилова Т.Л.)Кыыллаах

Максимов Валентин- 1 миэстэ 2 кл (Торговкина Е.М) Кыыллаах

Кугасова Саша- 3 миэстэ 2 кл (Кугасова Н.Н.) Кыыллаах

Уфимцева  Мила – 2 миэстэ 3 кл (Яковлева Л.Л) Кыыллаах

Кыайыылаахтар Гойдь Марк 3 миэстэ (учуутал Петрова Н.Н) Токко

              Сахабыт тылынан кэпсээн, остуоруйа бөҕө истэн санаабыт көнньүөрэн, санаа атастаһан тарҕастыбыт. Саха тылын сарсыҥҥыта биһиги бэйэбит илиибитигэр баарын өссө төгүл итэҕэйдибит.

 

Корнилова Т.Л.

Кыыллаах орто оскуолатын алын сүһүөх учуутала