Оскуола оҕолоро мамонт уҥуоҕун буллулар!

Бэс ыйын 23 күнүгэр, Өлүөхүмэ улууһун Даппарай сэлиэнньэтин оҕолоро нэһилиэк ыһыаҕын кэнниттэн Өлүөнэ өрүскэ балыктыы сылдьан сэлии (мамонт) уҥуоҕун буллулар.

Оскуола дириэктэрэ Иннокентий Малгаров иһитиннэрбитинэн, оҕолор сэлии уҥуоҕун булан баран, хостообут чаастарын туппутунан нэһилиэк түмэлигэр тиийбиттэр. Түмэл салайааччыта, кыраайы үөрэтээччи, педагогическай үлэ бэтэрээнэ, Өлүөхүмэ улууһун, Кыыллаах нэһилиэгин бочуоттаах олохтооҕо Садот Моисеевич Малгаровкөрөн баран, сэлии уҥуоҕа буоларын бигэргэппит итиэннэ оҕолор ааттарын (Владислав Худаев, Родион Данилов, Мичил Тектясов — 9 кылаас үөрэнээччилэрэ, Никита Ноев — 8 кылаас үөрэнээччитэ) хантан, хаһан булбуттарын сурунан ылбыт, хаартыскаҕа түһэрбиттэр.

1984-1985 сс. учуутал Корнилов Валерий Петрович булбут уҥуохтара.

Санатар буоллахха, нэһилиэк кыра да буоллар, баай историялаах, ол эрээри, анал дьиэтэ суох (билигин оскуола биир хоһугар олохтонон турар)  түмэлигэр 1980-с сыллар ортолоругар уонна 2000 сыллардаахха булуллубут уҥуохтар, муостар бааллар. Онтон сылыктаатахха, Өлүөхүмэ улууһугар сэлии кыыл балай да  үөскүү сылдьыбыт буолуон сөп.

2000 сыллар саҕаланыыларыгар Митимов Артем Ильич булан, олохтоох түмэлгэ туттарбыт муоһа

Оскуола дириэктэрэ, СӨ Наукаларын академията сэдэх булууну истэн, чинчийии ыытаары экспедиция тэрийэн эрэр үһү диэн эбэн эттэ.

Людмила ПОПОВА, “Саха сирэ” хаһыат, edersaas.ru

Добавить комментарий

Ваш e-mail не будет опубликован.

Лимит времени истёк. Пожалуйста, перезагрузите CAPTCHA.