Кыыллаах оҕото кырдьаҕастарга муосталарын оҥорон биэрдэ

Бу күннэргэ дьиэҕэ олоруу эрэсиимэ буолан, биирдиилээн дьон, тэрилтэ «Инстаграм» сирэйдэригэр араас сонуну хото суруйаллар, куонкурустары, «быһа эпиирдэри» ыыталлар. Онон чуҥкуйарга төрүөт суох. Хайа уонна араас холобур батыһыннарыылаах буолан, үтүө дьыаланы оҥорор дьон ахсааннара элбии турарыттан киһи үөрэр. Биир оннук аһымал аахсыйаны тэрийээччилэр ахсааннарын байытааччынан Өлүөхүмэ улууһун А.Л. Бахсыров аатынан Кыыллаах орто оскуолатын 11-с кылааһын үөрэнээччитэ Родион Данилов буолла.

Кини нэһилиэгин баһылыгын көрдөһүүтүнэн кырдьаҕастар туоруур муосталарын өрөмүөннээн биэрдэ. Бу туһунан «Инстаграмҥа» көрөн баран, мин Родиону бэйэтин булан кэпсэттим.

  —  Саҥа Даппарайтан Эргэ Даппарайга барыыга Тарыҥ үрэҕинэн ааһабыт. Эргэ Даппарайга сүрүннээн саастаах дьон  олорор. Үрэх күүстээх сүүрүктээх буолан, муоста биир өттүн хайы сүүрэн кэбиспит этэ. Онон ардах түстэҕинэ, уу улааттаҕына, киһи хаайтаран хаалар.

    Кырдьаҕастар «сылдьарбытыгар ыарахан» диэн, баһылыктан саҥа муостаны оҥорорго көрдөспүттэр этэ. Онуоха баһылык миэхэ матырыйаалын биэрэн туран, муостаны өрөмүөннүүрбэр көрдөспүтүгэр, тута  оҥоро охсон биэрбитим, — диэн кэпсиир Родион Данилов.  

«Хас хонук устата оҥордуҥ?» — диэн ыйыппыппар, сэһэргэһээччим: «Чаас аҥарын иһинэн бүтэрбитим», — диэн холку бэйэлээхтик хоруйдуур.  

Родион Данилов уһанарын инстаграмҥа көрөн, сөҕүү-махтайыы буоллум. «Оскуола үөрэнээччитэ хайдах маннык сатабыллаахтык уһанарый?» диэн эһиги, күндү ааҕааччыларым, «Саха сирэ» хаһыат кэлэр нүөмэригэр Родион Данилов үлэлэрин туһунан «Сатабыл» рубрикаҕа аахтаххытына, эмиэ сөҕүөххүт уонна соһуйуоххут дии саныыбын.

Кыыллаах орто оскуолатын үөрэнээччитэ Родион Данилов Ийэ дойдуга бэриниилээх буолуу сылыгар нэһилиэгин кырдьаҕастарыгар буор босхо күн аайы сылдьар муосталарын чаас аҥара иһигэр оҥоро охсон биэрбитэ — өрөспүүбүлүкэҕэ бастыҥ холобур. Көрдөххө кыра дьыала курдугун иһин, төһөлөөх үгүс киһиэхэ үөрүүнү бэлэхтээбитэ буолуой!

Елена ПОТОЦКАЯ, «Саха сирэ» хаһыат, edersaas.ru Хаартыска — Родион Данилов дьиэтээҕи архыыбыттан.

© edersaas.ru сайтан: http://edersaas.ru/kyyllaah/