Дьикти кэрэ мюзикл

Мюзикл

Сана дьыл түбүктээх күннэригэр «Алгыс» культура киинин художественнай салайааччыта О.А. Акимова үлэтэ – хамнаһа үмүрүйбэт, өссө эбии тахсан иһэргэ дылы. Ахсынньы 30 күнүгэр Кыыллаах кулуубугар, сарсыныгар оскуолаҕа о5олор “Айылгы” ырыа – үҥкүү түмсүүтүн кыттыылаахтара, “Күбэйэ“ ансаамбыл үҥкүүһүттэрэ, “Чуораанчык” диэн ааттаах “Кыталык” детсад иитиллээччилэрэ норуот остуоруйатынан мюзикл көрдөрдүлэр.

Эмээхсин оруолун 7 кылаас үөрэнээччитэ Ларионова Айыына толордо, Принц оруолун 10 кылаас үөрэнээччитэ Латышев Андрей ситиһиилээхтик оонньоон-ыллаан дьоҥҥо тиэртэ. Кыыс оруолун 8 кылаас үөрэнээччитэ Корнилова Айталы-Куо күүстээх куолаһынан ыллаан, ситэрэн-хоторон биэрдэ. Бу мюзикылга орто саастаах дьахталлар русалка уонна илиҥҥи норуоттар үҥкүүлэрин  имигэстик туттан-хаптан үҥкүүлээн  дьон биһирэбилин ыллылар. Ырыаһыттар Никитина Аида, Данилова Инна (10кыл.), Корнилов Вадим (7кыл.) араас тембрдээх куоластарынан ыллаан киэргэттилэр. Ону таһынан кырачаан оҕолорбут да хаалсыбатылар, чоппууска да буолан ыллылар, эбисийээнэ дойдутун олохтоохторун үҥкүүтүн кыайа-хото үҥкүүлээн тэйдилэр.

Бу киэһэ мустубут дьон олус астынан, дуоһуйан, сынньанан салгыы дьиэлэригэр Саҥа Дьылларын ылаары үөрэ-көтө тарҕаспыттара.

Аида Никитина, 10 кылаас.