Биһиги 3-с кылааспыт

Биһиги, дьүөгэлии кыргыттар, 3-с кылааспыт туһунан суруйан билиһиннэрээри гынабыт. Оскуолабыт олус улахан, сырдык, икки этээстээх таас оскуола. Кылааспытыгар 12 уол, 5 кыыс буолан иллээхтик үөрэнэбит. Кылааспыт салайааччыта Яковлева Лена Лазаревна.

Уолаттарбыт төһө да элбэхтэрин иһин кыргыттары атаҕастаабаттар. Хата, переменаҕа бэрт эйэлээхтик оонньуубут. Ордук сүүрүүлээх-көтүүлээх оонньуулары. Садот, Филипп наһаа көрдөөх-нардаах буолан, күллэрэллэрэ элбэх. Үөрэхпитигэр кыһаллабыт. Иккиэн туйгуннук үөрэнэбит, уолаттартан Фролов Кирилл наар «5» үөрэнэр. Уфимцева Мила, Убабытова Арина, Желлаев Артём, Корнилова Лилиана, Корнилов Тамерлан, Максимов Рома, Морохоев Садот, Максимов Марк, Павлов Виталий үчүгэйдик үөрэнэллэр.

Бу үөрэх дьылыгар араас тэрээһиннэргэ барытыгар көхтөөхтүк кытынныбыт. Саха тылыгар оройуоннааҕы олимпиадаҕа мин, Худаева Сайыына, бастакы миэстэҕэ тиксибитим. Олунньуга буолбут Бүтүн Россиятааҕы бастакы ИЗО диктаныгар мин 3 миэстэ, Фролов Кирилл, Сильвестрова Саяна, Морохоев Садот диплом ылбыттара. Оройуоҥҥа «Чугдаарар чуорааннар» диэн хорунан ырыаҕа 2 миэстэ буоллубут. Өрөспүүбүлүкэтээҕи «Саха хоһооно»кэтэхтэн күрэххэ биэс буолан кыттыбыппыт. Мин Саяналыын «Бастакы хардыы» кэмпириэнсийэҕэ эмиэ дакылаатынан Абаҕаҕа, Өлүөхүмэҕэ, 1 Нөөрүктээйигэ сылдьыбыппыт.

Аны уолаттарбыт буоксаҕа, тустууга, хапсаҕайга куруук миэстэлэһэллэр: Убояков Максим, Павлов Виталий, Максимов Рома, Шестаков Дархан. Корнилова Лили, Уфимцева Мила, Убабытова Арина, Филипп үҥкүүлүүллэр. Оскуола иһинээҕи күрэхтэргэ нуучча биллиилээх суруйааччыта И. А. Крылов «Книга Квилт» күрэхтэһиигэ 2 миэстэ, Саҥа дьылга 3 миэстэ, оскуола төрөөбүт күнүгэр «Саамай ураты композиция» диэн сибэкки күрэҕэр кыайыылаах буолбуппут.

Аны туран, Садот, Мила, Арина, Лили, Сайыына буолан саахыматтыыбыт. Кылааһынан похуокка сылдьабыт, күһүн остолобуойбутугар отонноон туттарбыппыт, кыһыны супту муорус иһэн абыранныбыт. Сити курдук, иллэҥ бириэмэбитин туһалаахтык атаарабыт. Төрдүс чиэппэр бэрт түргэнник ааһа охсуо, ахтылҕаннаах сайыммыт чугаһаабытын билбэккэ да хааллыбыт.

Худаева Сайыына, Сильвестрова Сайаана, 3 кылаас үөрэнээччилэрэ